人稱四叔嘅本港華資富豪恒地（012）主席李兆基，居然咁多年都未住過屋仔，好似比起李超人有所失色，加埋近年兩個仔又聽話，好努力咁通過傳統或者高科技，去壯大家庭成員數目，所以四叔終於喺舊年豪擲18.2億，買起中建集團許世勳家族嘅山頂白加道35號物業嚟起大屋，樓面呎價高達6.82萬，創出本港賣地史嘅樓面呎價紀錄。
三仔爺一人一間屋
項目嘅圖則上個月亦成功獲屋宇署批出，會喺一層停車庫之上，起3幢3層高嘅獨立屋，平均每間屋近7917方呎，擺明就係諗住自己住一幢，大細仔各一幢，安排好妥當。
不過，華華幫佢計吓，3幢屋批准嘅總樓面2.375萬方呎，發覺少過塊地可以起嘅最大總樓面喎，因為塊地面積有5.335萬方呎，起盡大約2.6675萬方呎。如果用批咗嘅樓面計算，樓面呎價就超過7.66萬蚊，咪再破自己嘅紀錄囉！而且仲貴過集團一度創出全球最高呎價分層單位紀錄（後嚟撻咗定）嘅西半山天匯68樓A室造價，都係呎價7.1萬咋。
不過，無所謂啦，因為啲屋都係起嚟自己用，多少都冇計，唔使諗點樣去賺盡呢家嘢，況且都可以趕及發水，隨時又可以好似李超人間深水灣大屋咁，多一倍豁免樓面呢。而且，四叔唔用盡地積比，可能係留有後着，剩番嗰2925方呎，足夠將來起多幢細小小嘅屋仔㖭，又或者學超人咁喺自己間屋起個會所呢！
李華華
mailto:[email protected]