陳慧琳（Kelly）早前出席公開活動時承認再度懷孕，坦言因為自己年紀大，今次的孖胎是人工受孕的。Kelly昨日接受訪問，她表示公開人工受孕是不想遮遮掩掩，怕以後被人查族譜。被問到若今次生孖仔會有何感想，她說：「唔好嚇我啦，如果唔係女，睇吓會唔會等吓再生。」
陳慧琳早前宣佈懷有孖胎，她昨日接受商台電話訪問時指不想隱瞞人工受孕的實情，她說：「費事遮遮掩掩，一陣啲人走去check我族譜話我屋企冇人有孖胎。」
「擔心湊唔掂」
Kelly指人工受孕是她自己提議的，又澄清並非周刊所指打了30多針，她說：「我打咗幾次，如果打30幾針個肚都爆啦，我打嘅份量唔多，逐次逐次咁加上去。醫生同我講我生孖係中咗六合彩，不過我同老公都擔心，擔心湊唔掂，人手又唔夠。」
懷孖胎的Kelly透露現時很容易感到疲倦，她說：「我家好易眼瞓，特別係食完嘢之後，要即時返上床瞓，食完個早餐又去瞓，夜晚食完飯又係咁，咁老公就唔畀我抱劉昇，佢會負責引開佢去玩，等我可以休息，中午就我湊，夜晚就佢湊。」
重6磅嗜水果
至於腹中BB的性別，Kelly指仍未確實，主持問她假若是孖仔會有何感覺，她即說：「唉，唔好嚇我啦，如果唔係女，睇吓會唔會等吓再生啦。」問到Kelly老公Alex有否送禮獎勵她懷孖B？她說：「佢一向都錫我，不過生仔都要用好多錢，又要請陪月又要搞屋企，唔使送啦。」最後Kelly指暫時重了5至6磅，胃口暫未有太大改變，平時最愛吃水果。
採訪：李珮洳
