山頂何東花園重建計劃被政府煞停，呢幢有歷史價值嘅大屋暫時得以保住，由於大屋係私人物業，多年來公眾都冇機會欣賞建築特色，八方搵到一啲大屋照片，可以睇到呢幢殖民地豪門巨宅有幾架勢。
建築中西合璧
何東喺1925年左右買入地皮興建大屋，據講何家上下都好鍾意打網球，因此何東花園內有草地、硬地網球場各一，由於何東妻子張蓮覺虔誠信佛，屋內有個觀音像荷花池。何東喺香港富甲一方，大宅內有左宗棠、曾國藩題字，留存至今，係珍貴歷史文物。
充滿中國文藝復興風格嘅何東花園係中、西文化結合嘅建築物，中式牌樓上刻有英文名字，又有一座塔樓，由張蓮覺提議興建，初時被指可能破壞風水龍脈，但何東後人似未受影響，家陣更被指有利風水！古老大宅總有啲靈異歷史，據稱戰時被最少五個炮彈擊中，屋內泳池堆滿陣亡軍人屍體，和平後先清理。