醫管局年報最引人注目，永遠係五名最高薪行政人員排名榜，突然唔撈返老家澳洲嘅前行政總裁蘇利民，舊年有452萬元人工，比前年加咗1.7%，終於成為最高薪人員，因為前年排榜首嘅下屬趙莉莉退休，趙醫生退休前有470幾萬元薪酬，認真和味。
五個高層09/10財政年度總共出咗1,990萬元人工，比前年2,102萬元微跌，除咗蘇利民加人工，第二高薪嘅新界東聯網總監馮康減咗5萬幾蚊，舊年攞389萬元年薪；張偉麟排第三，年薪383萬元，高過港島東聯網總監任燕珍1,000蚊，至於睇實HA幾百億資源嘅財務總監謝秀玲都有383萬元。舊年11月上任嘅新總裁梁栢賢有430萬元，相信出年榜上有名。
雖然高層人工高，但追壞賬好水皮，舊年醫管局有1.7億元病人收費未收到，當中包括豪住私家病房嘅病人同非本地人病人，醫管局追數要加把勁了。