立法會噚日每周例會，公眾旁聽席出現一個熟口熟面嘅稀客。熟口熟面係因為佢係前高官，經常曝光，稀客係因為佢離開官場後唔使再去立法會被議員「煎熬」，噚日卻自投羅網，咁大犧牲嘅係平機會主席林煥光。
林煥光現身立法會，唔係因為得閒路過，而係因為平機會早前公佈《公眾可進出的處所無障礙通道及設施正式調查報告》，向政府提出23項改變建議，令殘障人士喺公眾地方更易出入，議員噚日討論呢份報告，同時要求政府交代就廿幾項建議跟進情況，林煥光身為平機會主席，因此親自到場旁聽。
八方記憶中，法定機構話事人除非被立法會要求出席會議，或者定期滙報工作情況，否則絕少「自動獻身」到立法會，其他法定機構領導人，應該效法。