懲教署噚日喺柴灣歌連臣角懲教所舉行周年記者會，八方同行家參觀餐飲訓練工場期間，突然有在囚學徒捧住點咗蠟燭嘅生日蛋糕，仲大唱生日歌，原來噚日係無綫新聞主播黃家俊37歲生日，懲教署高層知道佢，請學徒整個蛋糕，畀個驚喜黃家俊。
黃家俊收到蛋糕都好驚訝，入獄食「皇家飯」唔「老黎」，食呢個蛋糕應該百無禁忌，而且寫下歷史。據懲教署人員稱，今次係史無前例有囚犯為街外人在監獄慶祝生日，笑言署方職員都從未有此特別待遇，因為懲教署人員膳食有專責廚師負責，毋須勞動在囚人士。黃家俊上星期返工途中炒車，幸好只係手指尾輕傷，不過大家日後可能冇乜機會見佢上鏡，因為佢4月轉職港鐵做公關，終於離開將軍澳堆填區。