鎮壓菜園村民同中聯辦示威者絕不手軟嘅警隊新「一哥」曾偉雄，被視為「鷹派」人物，不過唔係禿鷹，而係fit鷹，曾Sir噚日出席立法會會議，議員關注近年不時有警員猝死事件，追問曾Sir究竟有冇關心下屬健康，同埋有冇為警員定期做身體檢查，以便盡早知道身體毛病，防止一再有警員殉職。
玩瘦身 警腰圍有進步
曾Sir話警隊高層好關心警員健康問題，PTU、SDU等體力要求比較高嘅部隊，會要求警員定期檢查身體，佢又透露警隊10年「瘦身大計」已有成效，唔係削減人手、資源增值嗰種「瘦身」，係真真正正減肥。曾Sir指同10年前比較，現時警員腰圍平均數字有進步，即係警員肚腩普遍縮咗水。
不過曾Sir拒絕透露具體數字，只係話數字反映警隊推行嘅健康生活文化已有成效。八方強烈要求曾Sir公開收身詳情，事關香港人人想瘦身，若不提供如何瘦身詳情，有違公眾利益喎。不過話得說回來，曾Sir指警員腰圍平均數字較10年前進步，八方有理由相信，統計數據唔包括警方最高管理階層，因為有「小許淇安」之稱嘅曾sir，體態顯然與之前幾位「一哥」曾蔭培、李明逵、鄧竟成有別。
雖然警員越來越fit，但唔代表曾Sir好滿意下屬表現，講到CID人手緊張問題時，曾Sir有感而發，話當年佢自己做CID時私伙出個call機，都會畀個call機冧巴老頂，試過上頭急call，拍緊拖行街睇戲之際，都要即時撇低女朋友去辦案，可以話係24小時當值，邊有話落更o架！有記者問佢有冇激嬲當年女友，即係現時「一嫂」，曾Sir笑言：「仲講咁多，俾人鬧死咗啦！」
時代變 管理層改思維
曾Sir話現時文化唔同咗，所以管理層都要改變思維，因應時代而有唔同嘅管理方式，家陣已經唔可以要求CID好似佢當年咁有返工無放工，總之就要諗辦法解決人手緊張嘅問題，相信警員始終會盡忠職守維護法紀。
mailto:[email protected]