家啲新樓貴到癲，除咗樓價真係咁高之外，最重要係發展商鍾意打造一個金碧輝煌嘅大堂同會所，令業主都意想不到咁靚。好似新地（016）準備交樓嘅牛池灣峻弦咁，淨係個會所都有成5層咁多，夾埋有成9.2萬呎，仲話要5億去打造，你話誇唔誇張？
其中會所3樓係同「琉璃工房」合作，整咗個「琉璃水晶庭院」，擺咗12件用花做主題嘅琉璃工藝品，咁就使咗過千萬；至於個住宅入口大堂亦超豪，擺咗個高9米、有15.7萬粒施華洛世奇水晶嘅吊燈，點睇都係似5星酒店多過似住家。
雖然新地喺個物業度咁揼本，但係啲業主嘅入伙禮物只係兩個夾埋唔使一嚿水嘅蛋糕，唔通新地都鍾意玩你估我唔到？