馬艦政府新總部噚日舉行平頂儀式，預計年中落成，本年底入伙，新大樓設計意念來自「門常開」，煲呔噚日主持平頂儀式時話，希望公務員搬入新總部辦公後，切記時刻秉持開明、開放態度，積極進取，廣納民意。
官府始終係官府，不論在下亞厘畢道抑或馬艦新總部，官僚作風不會因搬屋而改變，屁股指揮腦袋呢個定律，亦唔會因為換了辦公室地點而有新思維，八方就唔相信衙門搬了，日後坐喺入面工作嘅官員會脫胎換骨。
協調在不同時間入伙
新總部還是那些舊面孔，現時喺不同政府合署坐嘅司長、問責局長，年底就會通通搬入馬艦工作，行政署正統籌呢個「世紀搬屋」大project，署長麥綺明噚日話由於十幾個政策局人員眾多，所以唔可以同一時間搬office，要協調在不同時間入伙。
誰先誰後進駐新總部固之然傷腦筋，八方收到風，一場公眾睇唔到嘅卡位暗戰已硝煙四起。官場消息指，唔同部門正就挑選樓層、座向、景觀同辦公室面積講數，需知道官越大應該坐得越高，有啲人唔鍾意同隔籬部門同一層樓「平起平坐」，揀位時自然諸多挑剔，多多聲氣。
馬艦新大樓面對維港，坐擁無敵海景靚位當然搶手，只是好景「筍盤」有限，邊個官員坐海景房，而是一個不易擺平的問題，八方聽聞近日有人指山景位都唔錯，風水較佳咁話。分配坐位爭崩頭，計算辦公室面積，公僕更加寸土必爭，八方聽聞有個別部門堅持需要多五呎辦公面積而與上頭講數，因為職員多，寸土不能少咁話。
搬新屋未必人人都咁緊張，政務司司長唐英年噚日露面時繼續「條條fing」，皆因佢下一站目標唔係馬艦，而係上亞厘畢道禮賓府，既然搬入新總部只係坐幾個月嘅「過客」，又使乜咁緊張呢？反而發展局局長林鄭月娥就應該要睇得緊啲，因為佢係未來政務司司長頂頭大熱，日後個局長或者係司長辦公室當然要順風順水先得啦。
mailto:[email protected]