若果以球會級計，2010年肯定喺國際米蘭最風光一年，攞歐聯、意甲同意盃，成為「3冠王」，光芒盡蓋其他球隊。國米呢一年稱霸意大利球壇，自然喺周一嘅意甲奧斯卡頒獎禮威到盡，但身為成員之一嘅史奈達又同個人獎無緣，真係戥佢唔抵。
又輸畀阿根廷人
周一意甲奧斯卡中，國米一共擸咗8個獎，最佳球隊固之然嘅佢哋，就連其他個人獎項國米都威晒，大獎好似最佳球員、最佳教練呢啲一定有，而最佳入球、最佳後衞同前鋒較為細嘅獎一樣攞埋。不過睇睇得獎名單，馬爾干、森美爾等都有份，惟獨是被視為2010年最佳球員嘅史奈達繼續「食白果」斯人獨憔悴。
對史奈達嚟講，去年一定喺佢表現最好嘅一年，早前世界金球獎連三甲都冇份，已經有好多人戥佢唔抵，仲有話如果金球獎行番舊制，呢位荷蘭國腳係一定當選㖭！估唔到嚟到意甲奧斯卡頒獎禮，史奈達又落空，佢有份入圍嘅最佳外援獎，最終都係輸畀隊友迪亞高米列圖；家無論嘅國家隊層面，抑或球會級，史奈達都輸畀阿根廷人，都幾無奈。
至於摩連奴奪得最佳教練一獎，實至名歸之餘，都算係苦盡甘來，話晒喺意大利嘅日子受到唔少批評，但最終得到認同，可謂得來不易；佢就因為要帶皇馬踢周三場西盃4強首回合對西維爾，所以就冇出席頒獎禮，但都透過錄影片段答謝各方。
摩連奴奪最佳教練
不過「狂人」喺意大利成功，唔代表家喺西班牙一樣名成利就，單係最近佢同皇馬總監華丹奴嘅不和已經知道前路同初教國米時一樣咁難行，而摩帥日前仲公開批評華丹奴，實行將兩人嘅唔妥關係升級，睇嚟佢日後可能有機會再次角逐意甲最佳教練呢個獎。
2010年意甲奧斯卡獲獎名單
最佳球員：迪亞高米列圖（國際米蘭）
最佳外援：迪亞高米列圖（國際米蘭）
最佳本土球員：迪拿達利（烏甸尼斯）
最佳教練：摩連奴（國際米蘭）
最佳前鋒：迪亞高米列圖（國際米蘭）
最佳後衞：森美爾（國際米蘭）、基亞連尼（祖雲達斯）
最佳門將：施薩索拉斯（國際米蘭）
最佳新秀：柏斯托尼（巴勒莫）
最佳入球：馬爾干（國際米蘭）
最受球迷喜愛球員：卡雲尼（拿玻里）
最佳球隊：國際米蘭