近年勞工界怨氣多，我說要五天工作，你說人工加幅追不上通脹，他說要最低工資；老闆及上司有時會選擇性失聰，對員工意見充耳不聞，勞資關係越見緊張。36歲的黃澤禮（Charlie）是旅遊服務網站Zuji總經理，他說員工是公司最重要資產，做老闆最重要懂得聆聽員工心聲，讓員工自由發揮，公司業務才會穩步向前。
與員工外遊打好關係
Charlie身形高大，掛上陽光笑容，驟眼看有點像藝員王浩信。在澳洲悉尼大學畢業後，Charlie投身畢馬威會計師事務所做審計師，獲執業會計師資格，曾於香港及悉尼分公司工作共六年，「嘩，嗰時日日做到天昏地暗，最早做到夜晚9點先收工；如果要返國內，可以連續三星期，每日凌晨3、4點先收工，然後朝早10點再開工」。
得閒死唔得閒病的工作非Charlie所願，適逢當時女友在日本工作，Charlie遠赴日本，投身東京一間廣告公司擔任財務總監四年，並與女友結婚。「直至發現歲半嘅女竟然同我講日文單字，我就覺得：唔係喇！要返屋企喇！」Charlie所說的屋企，是香港的家。
07年回港，Charlie加盟旅遊網站擔任財務部經理，年半前晉升為總經理，拓展社交網站的市場策略業務。年輕老總沒有架子，常常與員工打成一片，身為旅遊網總經理，上月與全體員工到曼谷三日兩夜，旅遊之餘兼打好關係。
勿只以公司角度設想
領導十多個下屬，Charlie說：「最重要係開放啲去溝通，唔可以只係用自己角度或者公司立場去睇一件事，要代入員工嘅情況，聆聽佢哋嘅需要，幫佢哋發展個人潛能。」這些管理之道知易行難，Charlie身體力行，每名員工每月總有一次機會與Charlie一對一盡訴心中情，「可以講吓對公司期望，鍾意嘅傾吓生活都得，咁當然，佢唔想講咁多，就會點到即止」。
Charlie的管理層風格亦反映在業務上，其公司透過社交網站facebook發佈有關旅遊小貼士及溫馨提示，利用軟性手法令客人感受貼身服務，「socialmedia係生活一部份，唔可以硬銷。有啲傳統公司，甚至政府都係，喺facebook寫幾大段嘢硬銷，啲人根本冇興趣去睇」。
年輕的公司，有年輕老總，加上年輕的團隊，腦震盪後發掘出嶄新業務方向，最近推出一個手機及電腦均適用的旅遊App，用家可自由發表到各地遊覽時的所見所聞，讓其他用家參考，形式就如飯局後在openrice發表食評一樣。
這個新玩意能否像openrice般發揚光大是未知之數，Charlie認為讓下屬的建議有機會落實更重要，「唔好太過控制（同事），畀多啲自由度佢哋去發揮所長，咁公司先會有新思維」。記者袁慧妍