隔晚花旗股市造好，道指升過百點，仲逼近12000關，相比之下，港股跌12點，顯然遜色，不過噚日港股唔係冇升過，恒指都試過逼近24000，只係保唔住升幅啫，港股先升後跌，唔係有乜嘢壞消息，只係假期因素，股民入市興趣唔大，成交買少見少，大戶喺即市舞高弄低搵食，既冇難度，贏面又大，所以波動已經預咗。
大局冇變，恒指仲喺10日同20日線之間反覆，仍係炒個別。
和黃C輪25731：和黃（013）報收93.85元，升0.8%。和黃近排都幾多消息，突破咗80元之後一路推上，高位調整幅度好溫和，喺10日線整固咗幾日又想郁過，試100元應該係下個目標，破位睇103元，可以諗吓隻C輪25731。
隻輪現價62仙，2011年4月18日到期，行使價93.88元，溢價6.6%，引伸波幅34.4%，槓桿率15.1倍（有效8.1倍），正股升上103元，25731睇1.208元，正股跌穿91.50元就沽咗隻輪。
俊樺