賭王分身家峯迴路轉，精采過TVB連續劇，真係金牌編劇都「度」唔出咁緊湊情節，幾房人爭住做主角，最新登場係賭王何鴻燊細妹何婉琪（十姑娘）。
八方聽聞十姑娘好關心澳娛股權分配問題，因為牽涉到佢嘅權益，十姑娘噚日話：「阿Stanley（何鴻燊）的而且確好錫阿三同Pansy（何超瓊），不過，澳娛差我同威滿利（基金會）咁多億（元股息），唔可以拖咁多年都唔畀番我，咁好唔公道。」
十姑娘噚日又發出聲明，指澳娛並無股東名冊，現時所謂「股東」，包括三太、四太同超瓊等，都唔係合法股東，澳娛必須盡快重做股東名冊，否則股東大會所作嘅決議，日後都有可能被法庭宣佈無效，十姑娘呼籲出席股東大會嘅人士對所有議程投反對票。
據講十姑娘去年曾去信澳娛要求派息，但一直無回音，正考慮再提出訴訟，假如呢次分身家事件損害佢利益，八方相信十姑娘肯定唔會坐視，分身家事件好戲陸續有來。