時代轉變，乜嘢都講男女平等，紀律部隊亦都唔例外。警隊繼1995年起，所有女警都要接受槍械訓練同陀槍行咇之後，警隊日前又寫下另一頁歷史，就係女警持長槍步操表演。
警隊今個月初有幾個隆重典禮，包括前「一哥」鄧竟成主持任內最後一次警察學院結業禮，以及警隊為鄧竟成舉行嘅告別儀式，都有女警持AR-15長槍參與步操表演，雖然陀槍師姐已經好普通，不過揸長槍卻比較稀罕，呢兩次儀式，原來係警隊成立168年以來，首次有女警揸長槍步操。近年越來越多女警加入警隊各部隊，G4、PTU都有好多女警執勤，女高官、局長喺特區上位已久，唔知幾時先誕生首名女警務處處長？