上禮拜五花旗股市雖然偏好，但係港股跌穿咗10日線之後偏淡情緒增加，噚日跟隨花旗股市高開之後，最終都係倒跌收市，恒指唔見咗75點，報收23801。
期指結算臨近並冇刺激大市交投，農曆年假將至，股民傾向減持同觀望，相信喺過年前成交會越嚟越縮，玩即市期指同窩輪炒賣要特別留神，因為好易被挾倉。
近排基金股受追捧，睇嚟都繼續輪流炒，可逐隻玩短線。
友邦C輪26303：友邦保險（1299）報收21.90元，升1.3%。股價積弱咗一排，近日由低位回升，已經升破10日同20日線，應該會部署上試位處22.26元嘅50日線，破位睇22.80至23.50元，可以諗吓隻C輪26303。
隻輪現價24.3仙，2011年4月29日到期，行使價19.68元，溢價1%，引伸波幅21.3%，槓桿率9倍（有效7.7倍），正股升上23.50元，26303睇38.9仙，升幅6成，短炒算吸引，正股跌穿21.30元就沽咗隻輪。
俊樺