生於這個既發達又安全的大城市，若叫港孩多點關心「戰爭」，他們大概會「寸嘴」的反問：「關我乜事？」但誰能夠拍心口保證，香港永遠不會被炮彈襲擊？港人不會在聯合國出任要職？最重要的是：有戰爭的地方，就有不人道的情況。由戰爭引伸的「人道教育」，就是一班被人笑稱「乜做啲咁儍嘅嘢」的義工們，最大的作戰能量。
小孩感受地雷陣殘酷
跟港孩談「戰爭」，硬是有點「雞同鴨講」的諷刺，不難令人懷疑他們即時想起的不是onlinegame《三國剎》，就是《高達》以及《鋼之鍊金術師》，「唔好漏咗，仲有打機時死完又翻生無限次復活嗰啲打不死戰士呢」。這一點「補充資料」由專注推動戰爭禍害的朱天華說來必定無誤，「冇錯，喺和平時叫人關心戰爭，確實唔容易」。
中學時看罷《南京大屠殺》，朱天華淚眼未乾就到訪南京大屠殺博物館「身歷其境」，「睇見戰時周圍鋪滿晒骨頭，每一副骨頭都好完整，左叠右、右叠左咁，嗰一刻好震撼」。04年參加紅十字會「人道之旅」，到訪南韓戰爭博物館，更促成她與「戰爭」的長期作戰。「我睇見無論係平民抑或軍人，都因為戰火而令到生活悽慘，真係好感傷。」此後她開始專注戰爭引伸的人道教育工作，包括在紅十字會下的「人道教室．生命學堂」擔任義工，四出到學校宣揚「戰爭也有規限」，今年更出任召集人。
「戰爭也有規限」，意即保護沒有或被迫參與戰鬥的無辜者，同時限制戰爭所用的方法及手段，減少市民受到的戰爭之苦。例如地雷陣便是極不人道的作戰手段，「我哋會叫啲小朋友角色扮演，一啲扮軍人，一啲扮平民，佢哋自然會發現，最終踩到地雷嘅大部份都係平民百姓」。
祖國兒童保家衞國意識濃，早前一班內地小朋友參加佈地雷陣活動時，就開宗明義力撐有需要以地雷防禦外敵。但在角色扮演後，驚覺地雷實在不能區分士兵與平民，死傷的十居其九是平民，「結果佢哋都態度有變，有人開始質疑：係咪一定要佈地雷呢？」
扮童兵後更珍惜現況
童兵則是學生們最關心的戰爭問題。「通常啲小朋友扮童兵，試過拎住支好重嘅槍扮上戰場後都會感受好深，事後都會問：點解我哋同樣年紀，生活差異咁大？」不少學生因此表明更珍惜現有一切，不會輕言放棄，朱天華欣慰稱，「至少有一啲重要價值，可以透過人道教育喺年輕人身上播種」。
王振南是人道教研室的前召集人，每當提起戰爭，總是「咬牙切齒」，「我係一個好反戰嘅人，唔鍾意戰爭，甚至乎見到人哋打拳或者打跆拳道，我都覺得好殘忍、好唔舒服」。他笑指曾經有活動參加者事後向他稱，「香港真係好少咁儍嘅人，會講呢類型嘅嘢」，但他堅持和平時候必須宣傳戰亂的禍害，「到真係戰爭嘅時候，大家都已經水深火熱啦，仲邊度會有人聽你講嘢或者接受教育呢？」
還有一點令他堅持預防勝於治療：「例如香港啲小朋友長大咗，唔排除會去聯合國做一啲有關戰爭嘅工作o架喎，我都好希望有一日佢哋在位時，都可以知道乜嘢應該做、乜嘢唔應該做，盡量減低戰爭嘅代價。」而在2007至2010年間，全港約近30間學校參加「人道教室．生命學堂」計劃，約近1,200名學生受過「戰火」洗禮。記者許偉賢