律師會副會長何君堯因為被指倒劉皇發而開始為人熟識，法律超人謝偉俊原來早喺八十年代已同何君堯結緣，佢話當年同何君堯一齊喺香港大學修讀法律深造文憑，但何君堯唔知因乜原因，第一年留班，而佢冇乜讀書就順利升班喎。喺九十年代，呢位同班同學更加代表鄧小艾告佢同白姐姐誹謗，官司最終庭外和解。
謝偉俊唔知何君堯係咪銳意喺新界西直選，但佢就好大機會喺旅遊界競逐冧莊，仲自信選票可以多過上屆。佢炮轟旅遊界2月1日落實嘅一團一導遊做法過嚴，又指坊間盛傳導遊工會有好激嘅抗爭行動，例如企喺店舖外叫人唔好買嘢。據聞傳言令政府響起警號，搵緊謝偉俊拉線同工會對話，希望和氣生財。