喺外地闖蕩超過13年嘅巴西名將李華度，將以借將身份加盟巴甲聖保羅；計埋朗拿度同朗拿甸奴，呢個02年幫巴西捧走世界盃嘅「3R」組合齊集巴甲！李華度96年離開彭美拉斯後，踢過嘅勁旅有巴塞隆拿同AC米蘭，之後去希臘奧林比亞高斯同AEK雅典，喺歐洲一共踢咗12年波；而佢08年夏天竟然投身烏茲別克嘅賓約哥踢亞洲賽，年薪仲超過1,000萬歐元㖭！
38歲嘅李華度今次鳥倦知還，一定勾起球迷集體回憶。巴西喺02年憑李華度同「大細哨」組成3R，歷史性第5次捧起世盃。諗番朗拿度家喺哥連泰斯，李華度就去聖保羅，兩間球會都喺聖保羅市；而朗拿甸奴加盟嘅法林明高就喺里約熱內盧，但距離都唔係好遠，3R聚首一堂，睇嚟5月開鑼嘅巴甲都幾令人期待喎！