日本體壇靚女多，例如女排主攻手6呎1吋嘅木村沙織、體操「大眼妹」田中理惠同羽毛球「甜姐兒」潮田玲子等。而一直靚爆乒球壇嘅「瓷娃娃」福原愛，最近就遇到對手；講緊嘅就係將於周四（27號）推出性感寫真《Yotsumoto》，盡show身材嘅「乒球壇LadyGaGa」四元奈生美（NaomiYotsumoto）！
身高只得4呎11吋嘅四元奈生美，雖然球技普通，最叻只係08年喺全日賽混雙攞銀牌；但32歲嘅四元奈生美識得博出位，經常喺乒乓球賽事以奇裝異服登場，將比賽變成自己嘅FashionShow！好似佢上周參加全日本乒乓球賽首圈，就身披一件玫瑰斗篷打扮成美艷玫瑰，球衣更為有玫瑰花紋嘅白色百褶裙。
奇裝異服參加乒球賽
奈生美最終喺全日賽首圈出局，即集中精力準備今周推出嘅首本性感寫真《Yotsumoto》。呢本售價只係2,940日圓（約276港元）嘅寫真，入面所有服裝都係奈生美自己設計；今次嘅主題仲要以盡show胸部美感為主，其中一張宣傳照仲有透點誘惑，肯定令「球迷」睇到流晒鼻血！
去年遠赴泰國布吉拍攝嘅奈生美仲話：「今次係挑戰自己底線嘅新嘗試！」佢唔單止靚樣身材正，仲好有商業頭腦，喺下個月25日先推出寫真集DVD《Naomi》，或者隻碟仲會有其他「絕密照」，賺錢大計真係長賺長有！
以性感形象示人嘅奈生美，期望可以憑此喺社會得到更大嘅關注同迴響；因為正修讀服裝設計嘅佢，終極目標係改革女子乒乓球畀人沉悶嘅感覺，希望將時尚同性感等元素加入乒球戰衣上，令乒壇更有朝氣。唔知佢下次嘅戰衣，會唔會有更性感、更美艷嘅噴血之作呢？
