【本報訊】通脹下，精明消費者各出奇謀慳錢過年；留在家吃團年飯，又提早購備參茸海味儲貨，實行慳得一蚊得一蚊。
團年飯自己買餸煮
昨日到銀行換新鈔的葉女士表示，物價飛升，今年辦年貨時額外謹慎，「以前買啲又靚又大粒嘅乾瑤柱，家買啲細粒啲，買中間貨色」，還會四處格價。她續稱，今年拜年會採取「團拜」方式，「送禮送少啲，又食少幾餐，慳番好多」，又可節省車費。她透露日前吃團年飯，只是買便宜餸菜在家下廚，「以前會出去食，家就買菜、燒肉返屋企煮」。
盧太表示雖然派利是金額與往年相若，但其他方面都會慳，「年貨買少啲，海味一早買定，家至買就貴」，更表示家中的花膠及海參，都是數年前買下來的存貨。
安記海味負責人潘權輝表示，因人民幣及日圓升值，海味早於去年初已加價，歲晚反而不敢加價。為留住客人，他指冬菇、臘味、乾瑤柱等都以成本價發售，「臘味反而比舊年平一成，元貝一斤80粒，家成本650蚊，我哋都只係賣舊價598蚊」。不過他指出，市民為感受新年氣氛，仍會到海味店逛逛，「可能10樣嘢，有8樣之前買定，點都留番兩樣家先買」。