噚日有人報料，話阿嬌鍾欣桐最近喺內地拍攝電視劇《財神有道》時，同對手陳鍵鋒搭上。報料人話陳鍵鋒對阿嬌特別照顧，除咗親自煲湯畀阿嬌飲，阿嬌有次扭親腳，佢又乘機大獻殷勤將藥酒送到上酒店房，仲經常發埋啲肉麻短訊。對於呢單料，陳鍵鋒嘅經理人周小姐噚日就否認話：「絕對冇咁嘅事，佢哋只係合作拍劇。」