奧巴馬在白宮設國宴招待胡錦濤，美國名人爭相出席，但席位有限，好多人無門而入，大失所望。二百二十五位客人，每一位都係經白宮諗過度過嘅，卡達、克林頓呢啲，當然係在必請之列，其他人士就要睇吓有冇可利用之處或有襯托之用嘞，不過受到白宮青睞、視為有作用嘅人士，當然都唔係小人物啦，冇咁上下名氣，休想。
一位曾與太太報道八九年天安門事件而獲得普立茲獎嘅記者，現《紐約時報》專欄作家NicholasKristof與太太SherylWuDunn有份參加國宴，呢位先生在佢專欄記述，鄧小平在一九七九年訪美，在一次宴會中，座位與女星莎利麥蓮接近，莎利麥蓮好興奮咁向鄧小平講，文革時佢曾到中國一遊，碰到一位下鄉學者，學者話自己在鄉村從事體力勞動工作，向農民學習、鍛煉、身心愉快。鄧小平毫不客氣咁低吼一聲：「佢（學者）講大話！」
莎利麥蓮在銀幕上有個儍大姐、老天真、頭腦簡單、心地純良嘅中年女士形象，十分可愛。但在文革時期到中國旅遊，遇到學者，唔通係意外咩，梗係黨啲英明安排，學者講大話，佢又信，在政治上係十分simpleandnaive嘅，鄧小平飽吃文革苦頭，三下三上之後，重新掌權，故此一句就噴到莎利麥蓮冇晒癮。
Kristof話美中關係會向前走，但認為中國內部鷹派（佢筆下之中國切尼）好有影響力，任何人上台代替胡錦濤，都要揼吓自己心口，罵幾句美國嚟敷衍啲「中國切尼」，例如一位實際派人士習近平雖然已送咗獨生女去哈佛讀書，喺去年十月咪一樣「亂咁鬧美國在韓戰打細菌戰」！
習近平千金去哈佛讀書，唔知有冇美國聰明人特別關顧呢？據《廣角鏡》一篇文章講，中國的美國朋友基辛格好多年前就受過葉劍英所託，照顧孫女兒葉靜子留美入讀寄宿學校。呢，香港議員不久前講「延後利益」，基辛格就係專家中之專家嘞，中國俾佢嘅延後利益，數不勝數，有佢做榜樣，美國一啲高人梗係會在適當時候幫中國一把啦。