現實就是這麼弔詭，政府有個空缺，月薪10,250，吸引11,800人申請；差不多同一時間，政府另一個空缺，月薪165,350，居然得嗰20人申請。低薪嗰份工叫二級物料供應員，高薪嗰份叫廣播處長。
傳周融甘國亮候選
廣播處長公開招聘已經截止申請，政府話接獲20人應徵。咁巧合，前任廣播處長朱培慶宣佈離任之後，第一輪公開招聘都係有20人申請，不過當年政府話冇個揀得落手，要展開第二輪招聘，結果揀咗黃華麒。不過港台風水唔好得過西九幾多，黃華麒坐低兩年半就要起身。
咁邊20個人咁膽生毛，明知係三煞位都走去應徵呢？傳聞中嘅候選名單，包括港台節目主持人周融、亞視新聞部副總裁梁家榮、前新城高層甘國亮、浸大新聞系首席講師馮強、香港電台訓練及發展組前總監張圭陽等等。除咗助理廣播處長戴健文之外，冇人公開承認自己入咗表。