香港車主鍾意去商場Shopping，因為貪商場有得消費後免費泊車。臨近年尾，好多人開始趕住辦年貨過節，仲會買盆菜團年，買海味勝地上環係人都知難搵位泊車，當中的恒興行就推出買盆菜免費泊車一小時的優惠，獨家益《蘋果》讀者，順便教埋大家喺上環辦年貨有邊幾個停車場係好選擇。
記者：許維雅
攝影：林栢鈞
Model：Kit.J、Hailey@GMEModels
減收$25補貼車費
踏入農曆年前的最後一星期，亦係最後衝刺辦年貨的時候，上環德輔道西（俗稱海味街）一帶肯定逼到水洩不通，但唔揸架車去辦年貨，買到一袋二袋始終唔方便。唔少靚太教路，揸車去停喺附近停車場，行完一間先放低戰利品喺車度，可以輕輕鬆鬆再行第二間，各位廿四孝老公同孝順仔就要識做啦！不過位於上環海味街附近的停車場數量唔多，所以停車場收費唔平，最平都要每小時$20。老字號海味店恒興行為《蘋果》讀者推出一小時免費泊車優惠，只要買翡翠元寶鳳凰盆菜一盆，即可減收$25幫補大家泊車。若果無車揸都唔怕，因為只要憑印花都可以慳$25，幫補大家搭車搭的士。
翡翠鮑魚夠新鮮
近年有唔少家庭都鍾意食盆菜過年，出名喜歡煮兩味的恒興行家嫂Macy就以翡翠元寶鳳凰盆菜應戰，用料特別，新西蘭鹿筋、日本蠔豉及冬菇髮菜係指定主角，更以冲繩石垣島海鹽醃製的鹽香雞。最出位係盆菜會跟一罐顏色青BB的新西蘭翡翠鮑（1.5頭），Macy力薦未經漂染的翡翠鮑鮮味無窮。
地址：上環高陞街19號
查詢：25480153
最就腳
粵財大廈$20/小時（A）
上環德輔道西附近的停車場都屬舊式商廈，粵財大廈亦不例外，地方不大，時租車位約有25個。地面部份車位要上車架，泊二樓要搭車，係難泊啲，但慶幸車都唔算太窄。位置方便最緊要，沿修打蘭街行去高陞街只需2分鐘，是最近恒興行的車場，買盆菜最就腳，每小時只需$20。
地址：干諾道西88-91號
入口：修打蘭街
點去：沿干諾道西往西環方向，左轉入修打蘭街即見。
貼士：沒有高度限制，但上二樓要搭車，只收現金。
最多位
干諾道西118號$30/小時（B）
以車位最多、規模最大計算，干諾道西118號係附近之最，車位有40至50個左右，部份要泊露天位。由於易搵位，收費亦最貴，車場加價至每小時$30，更改由只接受八達通收費。不過要提醒大家，時租車場設於五樓，比較不便，而且經常遇到對頭車，泊車時間較長。
地址：干諾道西118號
入口：威利蔴街
點去：沿干諾道西往西環方向，左轉入威利蔴街即見車場入口。
貼士：高度限制1.9米、只接受八達通。
最易泊
中銀信用卡中心$20/小時（C）
泊位係好多女人死穴，何況舊式停車場，中銀信用卡中心停車場門口經常有位職員哥哥坐鎮，佢會樂意幫手泊車。停車場有兩層，約有30至40個車位，部份車位需要留匙。加上車場入口位於干諾道西大街，易搵易泊車場非佢莫屬。
地址：干諾道西68號
入口：干諾道西
點去：沿住干諾道西往西環方向，經過皇后街後不久即到。
貼士：高度限制2.2米、只收現金。
最快泊
皇后大道西爛地$20/小時（D）
想泊車快靚正，唔使慢慢每層兜，梗係泊爛地好，直駛入去就得。不過寸金尺土的上環，塊爛地都細過人，只得約15個車位左右，收費亦都唔會特別平，要每小時$20。起初無留意都唔知新街街口旁的小路可以駛上去，但原來好快好方便，沿和風街行返落高陞街只需要2分鐘。
地址：皇后大道西116號旁邊
入口：皇后大道西
點去：沿住皇后大道西往西環方向，去到新街街口即駛上左邊小路。
貼士：沒有高度限制、只收現金。
位極罕
想慳啲泊錶位，高陞街有兩小時錶位，但只得四個，極之罕有。唔怕行得遠上斜路，可以去沿東邊街上山到第二街，但都係常滿。
買翡翠元寶鳳凰盆菜 減$25
《蘋果日報》讀者凡持有此印花，於恒興行訂購原價$1,488的翡翠元寶鳳凰盆菜一盆，即可減$25，以$1,463優惠價購買。
．有效日期由2011年1月25日至2月2日。
．影印本無效。
．訂購時請說明持有此印花。
．如有任何爭議，恒興行保留最終決定權。
地址：上環高陞街19號
查詢：25480153
‧必須憑報紙印花才可以享有優惠。