大學校長換晒人之後，新人事新作風，繼早排城大校長郭位約記者行家BBQ聯誼，噚日輪到理大校長唐偉章邀請行家踩單車郊遊。落到場八方見唐校長自備單車帽，以為佢係單車老手，點知佢話單車都冇架，買頂單車帽都係諗住不定期咁租單車玩吓，有時佢經過單車舖見到架單車要成六、七千蚊，肉都赤埋咁話。
美國多風災水災
唔止單車，唐校長聲稱自己樓都買唔起。佢同八方講，世界上每個地方都有缺點，好似美國就多風災水災，成日俾人話係福地嘅香港，冇地震落雪呢啲天災，但最大缺點係樓貴。好似喺美國買幾千呎嘅樓，雖然只係木屋，但同一價錢喺香港幾百呎都買唔到，仲分分鐘係縮水樓。住喺理大租住單位嘅唐校長仲建議八方，不如掃啲美國樓揸手等升值。
堂堂大學校長都買唔起樓，八方怕遲早要住板間房，唐校長開解八方，話佢雖然冇絕世好橋解決呢個問題，但隨住中港大融合，叫八方不如喺內地置業，第時同小明齊齊坐高鐵返屋企。