吳君如早排宣傳完曾志偉監製嘅賀歲片《我愛HK開心萬歲》之後，呢幾日佢又開始忙幫愛人陳可辛嘅《神奇俠侶》宣傳，噚日佢同古天樂現身尖沙嘴，君如話近排忙住為兩套戲宣傳，根本冇時間陪囡囡，所以佢唔介意噚日有傳媒在場都帶埋囡囡同父母到場，爭取時間同屋企人相聚。
囡囡想要細妹
一直有傳君如想追多個，咁佢會唔會效法陳慧琳（Kelly）人工受孕？君如話：「恭喜佢，我覺得佢真係好開心，想做媽咪又可以得心應手，真係戥佢開心，希望佢生個肥肥白白嘅BB，但唔好咁大壓力。至於我就唔會考慮用人工嘅方法，因為我已經唔後生，人工唔係咁易，有啲人就算人工都未必得，所以Kelly好幸運同好勇敢。」
不過君如都認自己好鍾意小朋友，所以家好認真咁考慮收養，佢話：「係長毛（陳可辛）提議，我哋都開過好多次家庭會議，等忙完工作之後睇吓正式搵渠道申請。我都問過個女嘅意見，佢聽到都不知表現得幾熱烈話鍾意要個細妹，我都鍾意，一定要係中國人。至於老人家當然有啲意見，不過我哋要做佢哋都唔理。」
古仔怕染流感
同場嘅古仔因要不停飛宣傳新戲，正值流感高峯期，佢都怕俾人傳染，所以問定家庭醫生開定幾包藥傍身，佢話：「我唔係驚病做唔到宣傳，係怕發燒入唔到境唔可以返嚟屋企。」
