食物及衞生局副局長梁卓偉除咗係大國手，亦係鋼琴高手，4歲已經學琴。據聞佢無論求學時期、從醫甚至從政嘅每一個人生階段，都以琴聲、音樂相伴，家百忙中仍然會間中為一啲合唱團擔任指揮。
沈靖韜英國留學
雖然梁卓偉同香港音樂神童、06年喺國際鋼琴比賽攞獎嘅沈靖韜年紀差成截，但兩個人同樣係喺媽媽薰陶下，自小同音樂結緣。日前梁卓偉就應特首辦邀請，同沈靖韜見面，仲傾吓近況以至對音樂嘅睇法，並且即席合奏一曲《牙買加倫巴舞曲》，較勁一番。年紀只得14歲嘅沈靖韜原來啱啱去咗英國留學，唔單止已經適應當地生活，仲多咗好多時間練琴。