仲有個零禮拜，隻兔仔就到，一年一度逼爆維園嘅場面好快又會出現。維園年宵唔只係市民血拼乾濕年貨嘅好去處，仲係本土創意嘅大晒冷。有班網民同社運界朋友已經投咗個檔，重點出擊推銷一款叫《地產霸權》嘅棋盤遊戲。
個遊戲望落有啲似《大富翁》，但顧名思義，叫得做《地產霸權》，除非你係誠哥、四叔，否則想發都難。有份搞呢壇嘢嘅巫堃泰（Michael）解釋，遊戲開始時，玩家每人會獲分配一筆巨款，然後隨住遊戲展開，可以買地起樓或者起舖，但如果被對手收購到八成業權，物業就可能被強拍。簡而言之，去到最後邊個冇被食晒啲資產、生存到落嚟就贏。
望對港現況有更深體會
網名「小保方」嘅網民有份構思呢個遊戲。佢話，其實早喺一年多前，已開始有設計概念，但家個製成品加咗好多2010年發生嘅議題落去，例如有菜園村、高鐵等等，希望大家玩完之後，對香港現況有深一層嘅體會。
個遊戲好唔好玩要玩過先知，不過個棋盤設計得幾應景。例如天匯個格寫住「樓高八十八落訂後任撻」；尖沙嘴舊水警基地就係「昔日歷史文物今日富人玩物」；唔喺法國而喺將軍澳堆填區旁嘅康城就梗係「心曠神怡」啦。仲有，大浪西灣、南生圍……呢啲喺現實中地產商想玩晒嘅地方，喺遊戲中我哋都仲可以玩吓嘅。
「首創版」500副賣150蚊
Michael話，每副《地產霸權》初步定價150蚊，「首創版」共製作咗500副，每副附有出世紙同編號。今次佢哋能否站着賺錢，就視乎賣唔賣得晒批貨。同檔仲有維基媒體同尖碼之聲寄賣嘅產品，包括河蟹T恤。漫畫家高傑亦會喺入夜之後嚟檔口，幫襯嘅市民可以喺約十款畫中挑選心頭好，叫高傑即席揮毫。其中一幅畫係有關華叔嘅，Michael話市民幫襯畫呢幅畫嘅錢，佢哋會捐畀支聯會。
mailto:[email protected]