《蘋果日報》財經版炒股網站「港股王」去年初面世到家陣，差唔多一年，據聞有唔少diehard粉絲。想進步當然要虛心聽意見，加上就嚟春節，「港股王」就喺啱啱過咗嘅周末，喺銅鑼灣稻香（573）旗下迎喜大酒樓搞咗個名家飯局，邀請咗21位「港股王」升級會員食春茗。今次仲邀請到「港股王」名家曾淵滄，同兩位年輕名家高明、魏力，齊齊畀意見、講兔年投資心得，兼食鮑魚、嘆燕窩。
曾淵滄：利豐唔抵買
近距離同曾淵滄共膳，會員當然唔放過機會，問佢有乜投資心得。曾淵滄話，2012年係美國大選年，根據歷史，每次大選之前一年，美國股市都會升，事關股市唔升，總統用乜成績去見人？所以QE2（第二輪量化寬鬆措施）唔掂，QE3、QE4、QE5應該陸續有嚟，所以曾淵滄都幾睇好今年個市。不過，佢就提醒「好消息就係壞消息。」當美國經濟真係好轉，咁就代表股市要跌，事關美國唔再需要印銀紙救市。
除咗大方向之外，滙控（005）係香港人愛股，亦係曾淵滄嘅愛股，同樣揸住滙控嘅會員當然問佢點睇。曾博士話，對5號仔唔睇好亦唔睇淡，由於持股成本低，所以繼續長揸，唔沽又唔買。
又有會員問到利豐（494）抵唔抵買？曾博士就好直接話嫌貴，所以一路都冇買呢隻股。曾淵滄解釋，利豐靠收購維持高PE，一旦唔再收購，PE就回落，情況就好似中移動（941）咁。
Broker：報告王猛料益客
出席名家飯局嘅會員之中，唔少係金融從業員，其中一位做Broker嘅會員就話，「港股王」嘅報告王幫到佢慳唔少時間。原來佢02、03年時，已經周圍搵啲報告，撮要部份內容email畀客人。由於以前資訊唔發達，唔少投資者要等到中午先有大行報告睇，佢喺開市時就將大行報告撮要畀啲客，開市可以跟住買，通常都有斬獲，呢個服務好受啲客歡迎，所以佢一直都提供呢個服務。
家陣報告王幫佢做，佢只需要將報告王嘅猛料同啲客分享就搞掂，慳番唔少時間。咁又係呀，嚟緊港股延長交易時段，有報告王幫手，就唔使晨早起身趕住睇報告。
