究竟南華足主羅傑承以高價簽入畢特及基士文，可以吸引幾多球迷入埸支持南華呢？據報道，二人周薪合共約7萬英鎊，折合逾80萬港元，真係乖乖不得了！
畢特基士文人工襟計
算他們今年2月才正式披甲，踢足3個月，12個禮拜人工過千萬港元；尚未計算的、仍然是根據報道，羅傑承還會提供其名下物業，位於半山的2,000多呎單位作為宿舍，一人一個。雖然未有透露金額，但以市價計算，一般呎價都過萬，2,000多萬元的單位，月租恐怕要10萬，即係又多60萬，都未計二人的機票……，噢，當然，羅生或許派他的私人飛機接送，那就更加計唔到數！
恕我無知，記得季前羅傑承講過南華今季班費千萬，志在衞冕聯賽，成隊波都不過千萬，現時單係畢特同基士文都要千萬金元，令我有點跟不上。
我在想，若果作為香港球壇班霸，南華班費一季要千萬，那麼羅生另一支球隊天水圍飛馬的班費又係幾多呢？即係作為「二奶仔」，伙食打個8折都要800萬？兩個過氣英超球星的開支等於一隊波，點計都唔明如何回本。
講真，畢特畢竟不是碧咸，碧咸淨係賣球衣都抵番晒；此外，基士文在香港球迷的心目中，評價不會很高，因為當年他在車路士的表現相當貨不對辦，有負他在荷甲3屆神射手之名。再者，才3個月，可以產生何種效果，現時言之尚早。
照數面計，係南華領先聯賽榜首，唯一對手傑志又唔多爭氣，未能構成太大威脅，本季尾組強班做乜？而且3個月可以有乜？表現呢？真係咁鍾意搞波，不如搞多隊波好過。
當然，香港甲組聯賽理論上不容許一個人擁有多過一支球隊，所以天水圍飛馬只屬於羅太梁芷珊。所以，我真係迷失南華！
文：盧覓雪