凌緣庭，91年國際華裔小姐冠軍，未有如大部份選美佳麗投身娛樂圈，卸任後負笈英國，其後返港考取專業資格在商界發展。雖曾任職著名測量師行及多家本港大型地產公司，但一般人只記得她曾是大劉劉鑾雄旗下華人置業董事助理。可有後悔選美？「都有諗過o架。做嘢最緊要人同人嘅關係，IQ一定要有，EQ亦好緊要。」這才是智慧與美貌並重。
記者：陳皓怡 攝影：梁鑑章
早於04年已加入九龍倉（004），不再是華置「賣樓之花」，選美出身的凌緣庭，攻讀土地管理，考取專業測量師資格，其實不甘於做「花」。不過，選美冠軍總不會沒有優勢吧？凌緣庭說：「唔覺。可能做公關工作，做marketing、sales就幫到，你嘅網絡會幫到件事，我嗰行比較傳統。好多嘢需要畀人多好多倍努力，先可以攞到認同。」
踏足商業社會，任職卓德測量師行，凌緣庭已面對選美冠軍榮銜帶來的不便，「啱啱入職唔係好高級，但好多時老細都會覺得，不如你同我出去一齊開會，佢嘅出發點係唔夠時間了解個case，橫掂個case我負責，不如我去。但嗰陣可能係顧問公司關係，開會都係比較高級嘅人出現，我同老細出去開會，其他人會講『係囉，佢靚咪帶埋佢去見客囉！』你要makesure你做嘅嘢一定要做得更好，否則你嘅comment會更多。」
不甘做「花」努力爭認同
工作中最大的挑戰，不一定來自工作本身，而是工作衍生出來的人事問題。07年，凌緣庭調任時代廣場總經理，面對一個發展成熟的商場，要求變，求突破。不過，「改變其實都有風險，做得好梗冇問題，但做得唔好，你之前有75分，可能連之前嗰75分都冇埋，好大壓力。」
她選擇針對商場存在已久的問題着手，「時代廣場93年落成，到家已經有一定歲數，一個商場好成功唔代表永遠成功，你要keep住。」時代廣場最為人詬病是，「上到食通天就困咗喺度，啲好難落嚟，呢啲唔係新問題。」
於是她與同事構思，在一個落成16年的商場心臟──中庭，建造一條「飛天梯」疏導人流，但這將影響租戶生意，「會失去好多客人，呢啲人可能之後唔返嚟。」她與判頭多番研究後，決定在晚上施工，並在半空中加設工作枱，務求將白天的影響減至最小。
「同人合作其實好難」
另一個更棘手的問題是，「每個部門利益都唔同，講得掂A，B話你畀咗A咁我點？」凌緣庭選擇「抓大放小」，最緊要大方向一致，小問題慢慢再解決。「人同人嘅關係好緊要，IQ一定要有，EQ都好緊要。無論一個人幾叻都好，你係做唔晒啲嘢，攞個心出嚟做嘢，如果你同事願意攞個心出嚟做嘢，件事就差好遠。」
由測量師行，到大型公用機構、到私人公司，凌緣庭說，每個部門都有不同的專家，需要跟不同類型的人都能合作，才可以完成事情，「尤其去到管理層，你一定要同人合作到。」娛樂圈，憑外貌可增加觀眾緣；商業圈，靠外貌反而失人緣，「如果你唔了解人，同人合作其實好難。」
凌緣庭簡歷
．新加坡人
．91年獲華裔小姐冠軍
．回英國繼續大學課程，主修土地管理
．曾任職卓德測量師行，在港取得測量師資格
．任職九鐵物業發展處物業發展經理
．01年加入華人置業地產部，後任職董事助理
．04年加入九龍倉，任職海港城物業管理助理總經理
．07年任時代廣場總經理，現為時代廣場董事
為孩子放慢步伐
職場打滾多年，凌緣庭大部份時間任主管，工作逾十小時乃等閒，「單身以工作為主，做到好夜都冇問題，以前冇認真諗『我今日做到八點半就一定要走』。」直至3年前，為了兩個孩子她終放慢腳步，「以前全部時間放喺工作上，始終家要攞番個平衡。要weekend前清咗啲工作。」
「我唔覺得自己係女強人」
就算工作再忙，她的底線是一星期找一、兩天陪伴小朋友，「有時weekend需要做嘢都會帶埋佢哋去，你唔想miss咗好多嘢，多啲時間同佢哋溝通，如果唔係會好內疚。你生佢出嚟，但係生完佢出嚟又唔理佢。」
雖然如此，但問到家庭與工作何者重要？家庭並非壓倒性地勝出，「屋企同工作一樣重要。」暫時未想過放下手上工作，難道要一世做女強人，「我唔覺得自己係女強人，可能咁啱每份工都係咁多嘢做啫。」她笑說。
賣樓要識「取巧」
凌：凌緣庭 記：記者
記：為何轉職華人置業？
凌：華置本身係一隻收租股，但工作範圍好闊，賣樓、租務、物業管理三樣。我一開始做租務、物業管理，入咗華置3個星期就係911，嗰陣經濟差唔多係最差嘅時候，好多office租戶拉閘閂門走佬，再唔係就日日寫信嚟要減租，嗰陣有五成人話捱唔到。
定價最緊要
記：轉職賣樓，你覺得最困難地方在哪？
凌：定價其實係一門學問，靚單位個個都知喺邊，個個都想要，profit要攞得最盡。但總有啲冇咁靚嘅單位，最差嘅單位要令人覺得抵買喎。成棟樓賣晒每一個單位，定價好緊要，定價方面要取巧。
記：如何取巧？
凌：第一個負責嘅樓盤係上環單幢樓，由地鐵站行上去好近，嗰陣時發覺喺中環返工嘅人，鍾意租同買上環樓住，落SOHO去wet方便，發覺有呢個特點同demand，就想畀番一個新image吸引一班後生仔，改個yeah啲嘅名，叫ManhattanAvenue。係人都知金融界嘅人都係住喺Manhattan，想攞個relationship，層樓咁細你冇可能諗ManhattanPlace或者ManhattanSquare？Avenue差唔多。
記：只是改名字就行？
凌：頭炮好重要，每樣嘢都有momentum（動力），要掌握得好，如果（售賣期）攤凍咗就會攤好耐。好多發展商都有單幢樓，不過會擺埋一邊等佢慢慢賣，因為都係街坊買，經紀都畀個心理準備你聽，單幢樓係一個好難賣得晒同賣得好嘅物業，好多時賣六、七成就停喺度。賣樓都要靠經紀，嗰時花咗好多時間brief經紀，令佢哋清楚你賣啲product係乜？要幫佢做定撮要，畀番少少comparison佢，放埋盤菜喺佢前面。咁細嘅盤，佢哋唔會擺好多時間落去，你幫佢做埋，咁佢就容易啲sell，經紀都好實際。
