珠江船務（560）啱啱突破近半年密集頂，有靚仔業績支持，收集再等爆上。珠船2010年半年度（6月底止）純利6820萬銀，已經追貼09年全年度純利7583萬銀。係咁易計數，2010年下半年度純利同上半年睇齊，全年度純利已經上到1.36億銀，增長近80%，預期PE已經可以由家陣25倍，大降落14倍。
再講，珠船前排透過出售珠江內河貨運20%，引入龍頭招商局國際（144）做戰略夥伴。集團除咗可以獲得一次性收益7270萬銀外，呢次拍住大孖沙，雙方肯定起到互惠互利作用。嚟緊2011年度，純利只要係咁易增長25%到1.7億銀，預期PE進一步降到得11倍，Chinaplay有咁嘅PE，抵搞。呢轉睇實珠船，挨近兩蚊邊收集，以2011年15倍PE做目標，珠船要見2.88元，潛在回報率44%。
永保扭虧轉勢可短炒
永保林業（723）進軍林木業後，派發嘅第一張半年度成績表（2011年度9月底止），大幅虧轉盈賺1.83億銀（2010年半年度蝕4000萬銀），靚仔到爆。但永保股價經過上星期初以嚟調整，今年頭嘅升幅消弭一半，但相信集團有業績支持，股價遲早掉頭向上反映。呢轉短打，係咁易博永保升20%到0.48元，集團亦未有耐升到上每股NAV0.87元水位，仲係平到震。
錢雋