曾志偉父親曾啟榮日前病逝，馬時亨小時候喪父家貧，全賴舅父曾啟榮資助，才能學有所成。馬時亨昨日透露舅父離世時，他也在場送舅父最後一程。談到舅父的遺願是否返港，馬時亨即說：「佢心在香港！」但一切安排還要待曾志偉處理。
曾志偉父親、五億探長呂樂「頭馬」曾啟榮日前在台北病逝，享年94歲。曾啟榮是財經事務及庫務局前局長馬時亨的舅父。馬時亨10歲喪父，家境清貧要住板間房，小時候全靠舅父供養助學才能完成學業。馬時亨昨日在清水灣出席保良局高球活動，提起舅父不禁眼泛淚光。
憶舅父關愛眼濕濕
馬時亨說：「舅父仲未火化，佢走得好安詳。我同細佬、志偉一家、啲孫同曾孫都喺晒度，四代同堂。佢係老人病，新曆新年已經入過一次院，我哋去咗台灣兩次。」曾啟榮是通緝犯，多年來未能返港，問到舅父遺願是否返港？他說：「佢心在香港！具體安排就要問志偉，佢對後輩好好，香港好多朋友，好多人尊重佢。」
提到小時候曾受曾啟榮經濟支援，馬時亨即說：「唔止，交學費只係畀錢，佢係對家人好好，我哋細個好窮，舅父每個禮拜都會接我哋去飲茶，過年會買新衫畀我哋着，呢啲關心，唔係只係錢做，係關於我嘅成長過程。」說到此處，馬時亨哽咽起來，悲從中來眼濕濕。
「對我嚟講佢係爸爸」
會否向政府申請取消通緝令，馬時亨就表示不知情，一切由曾志偉處理。喪父的志偉連日悲傷不見人，問到舅父彌留時，志偉是否很激動？馬時亨說：「個個都好激動，我哋好親o架，對我嚟講，佢係我爸爸，我自細爸爸唔喺度，佢睇住我大，經濟上支持同關心，一直教我好多嘢。」
採訪、攝影：梁錦雯
