首爾Cheap男攞彩遊　殺價二折掃潮鏡

首爾，對女士們嚟講係一個天堂，化妝品護膚品衫褲鞋襪統統都好抵買。但男士們又如何呢？淨係陪伴另一半行街，負責做阿四嗎？Tune一tune個旅程，其實首爾都啱男士cheap買cheap食樂一番。

記者、攝影：蕭漢祥
Model：Cwing

買!
講價秘技　Tee變五八折

無可否認，女士們遊首爾好易會尖叫，化妝護膚品同靚衫之外，還有街上影唔完、放在店外做代言人的靚仔韓星。作為男士的小記，出發前都打定輸數做另一半的「挑伕」，咩東大門、明洞shopping實無嘢啱，但，這個輸數未免打得太早了。
購物熱點的東大門為例，Doota、Migliore、HelloapM，一連幾個大型商場又唔只係得女裝，男士服裝都有選擇。貨色跟旺角中心相若，但價錢就好有彈性。講價前謹記一項遊戲規則，就係還價之後，一旦賣家答應出價，就唔好再扭擰或唔買，否則隨時遭店員黑面及一連串boomboom聲（雖然唔知佢講乜）。巡過以上幾個場，發現都有心水推介喎。眼鏡係男士至愛潮物之一，在Doota、Migliore內多間店都有平價眼鏡可掃，Doota5樓的Dulos有一枱抵買潮鏡，款式以粗框為主，淨色至豹紋款乜都有，每副約$104。更可即場配埋鏡片，講價位就喺呢度，鏡片價錢以度數分為三級，約$104、$208及$313，試過第二級的$208鏡片講到$35（二折有多！）都得，落單後等30分鐘就有貨，唔錯！
男士服裝都有平價選擇，在Migliore睇中一件長袖tee，大約$264至$292，講價後大幅降至$153，足足打咗個五八折，所以話男士們都有唔少着數。

■平價眼鏡框都有靚款，框$104+鏡片$104加埋先$208。

■男裝長袖tee原價$264，殺價後$153，平咗成$111。

■購物前最好先繞場逛一圈，了解想買貨品在各店的標價，確保自己開價最低。

■Doota5樓有好多潮鏡選擇，有貴的也有超平的。

■鏡框款式時尚抵買，配鏡片更有得講價。

Dulos@Doota：
東大門乙支路6街18-12鬥山大廈5樓17號舖

食!
首爾「築地」　$10.5八爪魚刺身

首爾飲飲食食，在餐廳食韓燒、人參燉雞、辣年糕等傳統菜，睇餐牌明碼實價，開口攞discount只會俾店員怒睥。但食海鮮就有着數，鷺梁津車站旁的海產市場，被譽為韓版「築地」，海產日日新鮮運到。但韓國人大多數唔多講英語，市場內識普通話的更少，所以最佳搵食方法係，先去二樓的食肆，搵間店舖有識英語或普通話的店員，帶埋佢去市場揀海鮮。雖然這些店員大都會帶你去到跟餐廳有聯繫的檔口揀，但講價會容易啲，無計。
整體來說，在鷺梁津食海鮮較香港抵，今次以二人份量計，買了一公斤松葉蟹（約$119）、半公斤扇貝（約$42）、三隻鮑魚（約$70）、兩隻虎蝦（約$42），及兩隻八爪魚做刺身（約$21），以上每項order時店員已自動減價一二千韓圜，埋單加埋都是$294，唔貴！但因小記掛住搵國語人，竟然唔記得同餐廳講價，最後餐廳收取$182煮食服務費，且全部係清蒸和燒烤，全無廚藝可言，呢部份就有啲肉赤，所以奉勸各位入店前，最好傾清楚煮食費、烹調方法、攞定折頭就最抵。

■扇貝非常鮮味！半公斤約$42

■大大隻虎蝦用鹽燒最好，可惜廚師聽唔明。約$42/兩隻

■韓國版築地市場，日日都人頭湧湧。

■八爪魚刺身，吸盤吸住口腔最過癮。約$21/兩隻

■餐廳店員識簡單英文或普通話，講價容易啲。

YongGungHouse：
鷺梁津海產市場2樓

住!
$280韓屋　推房門即見雪景庭園

有時，作為一個日日食買玩的旅客，會覺得花近千元入住酒店，只係晚上瞓一瞓，起床就嗱嗱臨撞落街繼續戰鬥，感覺好唔抵。這次，我選擇入住民宿，既平又有特色。韓國民宿大多係由傳統韓屋改造而成，建築風格與自然環境的協調與和諧，是一個獨特的韓國文化體驗。再者，今年天氣特別寒冷，首爾更創出有史以來最凍氣溫，每隔幾日就落一場大雪，想像一下，夜晚你只能喺房間隔着玻璃賞雪幾浪費，但係住韓屋，趟開房門就係白色庭園，與另一半欣賞飄飄白雪幾浪漫。今次入住的FriendsHouse，房間地板加裝了發熱線，即使外面零下16度，房內依然暖笠笠！