"黑池鋒勇蓋荒特蘭"
原本唔想又寫黑池，但係今周迎戰新特蘭又有一講價值。首先佢哋主攻進取嘅打法，難得一向睇波好高格調嘅《藍奧議男》藍鑽石兄，早日也撰文撐佢哋好睇過億萬大軍曼城，小弟有啲感動，好似紅軍球迷自我安慰咁，「你永不會一個人行路」。另外黑池最勇嘅中場靈魂查理阿當正受到維拉金錢誘惑，頂唔頂得到呢半個月唔走我估五五波，黑池冇咗佢，會幾大鑊，趁佢仲喺度；對手新特蘭雖然排名高啲，但係戴倫賓特被維拉撬走，又有韋碧克唞兩個月（將簽入富拿），再睇客軍近5場作客只入得6球，上述嗰兩位仁兄佔咗一半，淨靠非洲兵基恩一人打衝鋒，得唔得呢？唔使理黑池下周中補賽迎曼聯，勇者尚攻，單W2.4倍可捧！
"賭直播要刺破紐記"
要賭直播，今日各時段英超戲碼極強，小弟認為熱刺作客贏紐記最值博。上仗貼紐記輸畀新特蘭，結果和波輸半格，今周紐記返主場迎上次貼佢哋會頂得住曼聯、結果贏半格嘅熱刺，後者都有一位勇者，唔去富豪兵團車仔揀熱刺加盟嘅南非國腳派拿。熱刺班波今季士氣從未有一天低落過，少讓平/半，有力食繼續冇迪奧迪同安祖卡路爾兩位中前者主將嘅紐記。
"布力般新帥去印度"
主題講勇者，布力般嗰位寂寂無聞、原教練剛升為領隊嘅卻恩，就真係夠沙膽。上年尾接替大儍做一輪替工，能力備受質疑，但夠膽話自己夠料擔正；本周中仲揦住個計劃書，去印度見新班主，又簽番辛達告達斯又有史浩克嘅鍾斯加盟，搞到班o架喱佬不知幾開心，唔等馬勒當拿，畀佢坐正簽約兩年半。有時後生冇包袱厚面皮就有咁樣嘅拼勁（43歲土炮初做領隊），動盪之時才有危有機。明日，布力般主場少讓西布朗平/半，對手上場險勝黑池止瀉有啲幸運，未確認重返升軌，被看淡但賠率偏熱，唔制！
"彼德堡主場瘋勇炒哈"
上周話唔鍾意賭英超，可以博伊朗同白禮頓兩場二線波，結果中到應；既然貼英甲有運，今周大家不妨再參考吓，今次改捧喺英甲又喪又勇嘅彼德堡，前列兵但主場成個聯賽入波最多又失得最多；喪者則炒完、又簽番費格遜嗰仔做領隊，即時擴軍望回升英冠，對中游哈特普爾，單W、[-1]同3:1及「主其他」波膽，望學上次貼白禮頓，一炮三響！
"烏甸有勇將得「米」"
意甲近年都有咁嘅波，又入得又失得，蠱蠱惑惑嘅烏甸尼斯，入波總計排聯賽第5失波排尾4，總排第8，前線兩位勇將被車仔挖角中嘅阿歷斯山齊士，加上矮仔迪拿達利好重要，周中盃仔原本各踢半場，點知打到加時12碼輸波，前者踢多半粒鐘。明天早場迎國米，李安納度上任後，國米5全勝，但失波極多，佢哋肯鬥攻波友梗開心啲，「主其他」同3:3波膽；兼重點押1.8倍入球「大」，合心水否？
蘋果波神
語錄：周末百幾場波，總會揀到儍波，發掘到刀仔鋸大樹嘅動力！