由天星、皇后到菜園村，朱凱迪見證住當權者「如何毀掉一支警隊」。
陳雲喺《如何毀滅一隊警隊》寫過：「毀滅一隊警察，不須人民起義，不須槍炮刀劍，只須政府以不義之名，唆使警察陷害忠良，警察就濫權營私，不成為警察，而成為家僕與鬼卒了。」
前日港鐵強收菜園村起高鐵，保安員將朱凱迪撻生魚咁撻，在場警察竟然無動於衷。噚日仲要睇骨科嘅朱凱迪話，雖然唔信警方會秉公處理，但同其他巡守隊員商量過後，決定今日去灣仔警察總部正式報警，一來唔想開先例，等對方以為就算傷害巡守隊員佢哋都唔會追究，二來亦係對警方嘅抗議。
由五年前保星衞后、到近年守護菜園村，朱凱迪曾經喺各種情景嘅抗爭行動同警方交手，但佢發現警方使用武力嘅方式同程度越來越唔尋常，新一年呢個月開始尤其明顯。佢唔去揣測究竟同被形容為「鷹派」嘅新一哥曾偉雄上場有冇關，但好似前日咁，引用職工盟議員李卓人嘅講法，已經出現咗「外判暴力」嘅模式。
泛民要求一哥交代
噚日學者等各界齊聲炮轟警方。泛民立法會議員亦計劃聯署去信一哥曾偉雄，要求佢交代；曾偉雄下星期三去立法會滙報罪案情況時，亦會即場質詢佢。泛民同時去信房屋及運輸局局長鄭汝樺，要佢交代如何妥善解決菜園村新村嘅路權、駁水、駁電問題，並透過立法會申訴部召開個案會議，要求港鐵同相關部門交代。
泛民諗住喺街板點出今次事件嚴重性，泛民會議召集人何秀蘭話：「因為呢次係好典型嘅地產霸權，官商合體的武力行動，如果我哋容忍呢種暴力行為滋長，將來每一人都可能成為受害者。」
香港人權監察譴責
阿人就呼籲現場嘅工人唔好聽無理命令，唔好使用暴力，又指出「中聯辦外開香檳就要拘捕，菜園村有人被撻低、入醫院縫咗三針，警方都唔去拘捕任何人，我唔明警方喺度做乜」。公民黨主席陳家洛則帶隊去九龍灣港鐵總部，抗議港鐵施工過程濫用暴力。
香港人權監察譴責港鐵暴力收地、要求警方徹查之餘，指出當局無妥善安排就強行收地同驅逐村民，根本違反聯合國《經濟、社會與文化權利的國際公約》。總幹事羅沃啟仲發現，日前曾有村民受傷，警方防線卻阻撓救護人員進場，好離譜。
mailto:[email protected]