看完近期幾齣日本片，《死魚》、《告白》和《惡人》，我的感觸是，這個年頭，女生比男生更壞，也更蠢！我並不是性別歧視，而是觀察入微。男生亂搞男女關係，除了消耗精力，又有甚麼損失？女生亂搞男女關係，無異引火自焚。男生爆粗，好像理所當然；女生爆粗，人格盡失。男女始終有別，冇得講。
看《惡人》中遇害女生的遭遇時，我幾乎可以聽到韓裔導演李相日在攝影機背後大叫：「抵你死！抵你賤！」滿島光演的佳乃，年輕貌美，卻勾三搭四，有男生追求，就張開大腿歡迎。網上交友，不知世途險惡。被闊少爺一腳蹬出車外，遇到祐一前來打救，又亂發小姐脾氣，正一累人累物，唔使可憐。
深津繪里演的光代都係！寂寞唔係大晒，人人都有寂寞的時候；關鍵是，怎樣去排遣寂寞。人家祐一飛擒大咬，不過想發洩慾火，愛情是絕望中滋生的感覺，如此而已。光代給我的感覺是，正經的剩女，終於有人垂青了，但也犯不着戀上殺人犯呀！當然，你會說，愛情是盲目的！愛情真偉大！我的結論是，作為家長，教男生好過教女生。
撰文：黃國兆