鬍鬚俠張超雄同職工盟李卓人等人牽頭成立工黨，經過一段日子醞釀，組黨眉目漸清，八方聽聞新政黨好有可能直接叫做「香港工黨」，組黨核心班底家每月開兩次會，初步分工係李卓人負責「組織部」，張超雄就負責「政策部」，除咗梁耀忠、何秀蘭等鐵腳，社福界議員張國柱最近都有一齊開會。
不過，張國柱話暫時未決定係咪加入工黨，先要問過社會工作者總工會點睇，亦要在民協與工黨之間取捨。
應該趕不及今年區選
職工盟方面，李卓人正徵詢各屬會意見，稍後就會決定係咪去馬。按目前進度，工黨應該不能趕及參加今年區議會選舉，不過職工盟今年會派人出戰區議會。如果可以在今年內成功組黨，就有望以打工仔、弱勢社群及有品中產旗號，出戰明年立法會選舉。
初步點兵，李卓人應該會留守新界西，張超雄有可能出戰新界東，但由於距離選舉仍有逾一年時間，如何擺位變數甚大，要仔細盤算。