華華身為一個記者，每日最忙嘅時間就係夜晚，因為要趕稿，所以好多熱爆全城嘅電視劇都無緣睇到。不過，最近朋友仔報料，話佢晚晚追開、由型男方中信主演嘅《仁心解碼》，硬係睇得唔多自在，事關套劇用醫院做背景，但係扮演病人嘅，個個都着住思捷（Esprit，330）出名嘅直間睡衣，仲間中影到個logo㖭，令佢煲煲吓劇都打個突。
其實呢招宣傳招數唔係新嘢，近年好多公司都好鍾意做呢種「植入廣告」（ProductPlacement），原意就係等觀眾喺不知不覺之間，增加對品牌嘅認知度。不過，所謂物極必反，做得太多、太明顯嘅話，就會令觀眾唔多「like」！而且，據華華對《仁心解碼》有限嘅認識，套劇好似有環繞精神病人嘅故事……咁到底觀眾睇完有無興趣買佢嘅睡衣呢，真係見仁見智嘞！
《非誠2》出現國壽保單
講起「植入廣告」，真係唔可以唔提下最近喺內地票房勁收4億嘅電影《非誠勿擾2》，呢套戲簡直就係將「植入廣告」發揮到極致！華華見到劇中演員無啦啦拎份中國人壽（2628）保單出嚟嗰陣，真係忍唔住笑咗出嚟！仲有，套戲不停影住「海南航空」個logo、對白又講咗N次「石梅灣艾美大酒店」，有時真係睇到無明火起，差啲要嗌回水。
聽講賣金銀首飾嘅金至尊，嚟緊都會贊助由劉德華同鞏俐主演嘅《我知女人心》，話說戲中劉德華係一個珠寶設計師，間公司就係叫做「金至尊」……真係想人唔為意都好難呀！
李華華
mailto:[email protected]