首煲呔家有喜事，在瑪麗醫院任職駐院醫生嘅大仔曾慶衍，去年通過外科專科醫生考試，幾個月前升職做副顧問醫生，現時跟肝臟移植權威盧寵茂學嘢，係瑪麗醫院肝臟移植小組成員，日後有機會獨當一面做換肝手術。
暫未能獨立做換肝手術
曾慶衍約10年前喺英國讀完醫科後返港加入瑪麗醫院，去年晉升做副顧問醫生，月薪逾11萬元。有人話曾慶衍升職速度唔算快，因為同期醫生已經晉升做顧問醫生也不罕見，亦與特權無關，而係因為公立醫院資深醫生流失率高，令年輕醫生有多啲升職機會。知情者形容曾慶衍「好有心」做肝膽胰外科專科醫生，因此考獲專科資格後升職順理成章。
盧寵茂領導嘅換肝小組人手緊張，長期唔夠人用，為咗避免出現有肝換而冇醫生做手術嘅情況，瑪麗近年致力培訓醫生做換肝手術，連埋盧教授，小組目前有四個醫生可獨立操刀換肝，曾慶衍雖然升咗職，但至今暫未可以獨當一面，係被稱為BTeam嘅成員，即係需要在指導下才可以進行換肝手術。
換肝手術複雜又高難度，就算有多年經驗嘅專家都不敢掉以輕心，因為一旦出錯，牽涉嘅隨時唔止一條人命，有資深醫生稱相信曾慶衍要學多幾年嘢先可以獨立做手術，至於做其他肝膽胰手術，當然冇問題啦。曾慶衍對升職十分低調，相信係唔想引起任何不必要注意，皆因煲呔係「惹火尤物」，牽連家人嘅風波不時發生，近年最為人關注係09年在《施政報告》提出換慳電膽計劃，卻被踢爆親家莫錦泉係「慳電膽大王」，市民質疑煲呔明益親家，令佢誠信大受打擊。
煲呔唔避嫌曾經釀風波
曾慶衍太太莫蔚淇都係醫生，05年考香港外科學院及英國愛丁堡皇家外科醫學院合辦嘅外科院士試臨床試，點知考試前一日煲呔請考試官食飯，後來有人爆料，質疑煲呔點解唔識避嫌，煲呔反駁事件係攻擊佢嘅「黑材料」，慨嘆「最驚新抱嬲咗我」。
mailto:[email protected]