俄羅斯資源豐富，當然會吸引唔少人去掘金，亦都有唔少上市公司去俄羅斯搵吓機會，創業板上市嘅一創科技（8111）都係其中之一。
不過，佢哋第一個俄羅斯項目買唔成之餘，仲要搞到上法庭，激到一創老闆侯曉兵怒吼：「俄羅斯好多騙子！」
內情係點？侯老闆話案件已經進入司法程序，唔方便同華華講。
據華華所知，公司喺1月份公佈，收購一個位於俄羅斯嘅天然氣田，一心諗住進軍清潔能源，但係勢估唔到個天然氣開採牌照已經喺09年底到期，即係話，即使一創買咗亦開採唔到，唔怪得侯老闆咁激氣啦！
侯老闆噚日仲喺股東會之後同華華講，好彩公司喺收購個項目之前有做咗DD（盡職審查），如果唔係就唔得了，喺買嗰個項目之前，佢仲差啲飛咗去俄羅斯睇項目。其實唔單止喺俄羅斯，去邊度做生意都要小心啲o架啦，咪搞到好似歧視俄羅斯咁啦！