唐英年日前訓斥80後一鳴驚人，贏得「A貨梁振英」稱譽，事隔一星期，正版正貨終於出場，梁振英聽日會上山，不會下鄉，係落區去慈雲山探訪，對像係80後，係80歲以上長者。
呢次準特首選舉候選人巡區活動由民建聯區議員陳曼琪穿針引線，據陳曼琪稱，由於區內居民對好多地區問題有意見，想請個「最高級」嘅人嚟聽吓基層民意，有街坊話行政會議話得事，提議邀請召集人見吓市民，因此佢聯絡梁振英，對方爽快應承。
陳曼琪稱已為梁振英安排多個「節目」，包括探訪區內90幾歲獨居長者，又會同街坊傾偈，佢又透露正組織逾百個居屋屋苑居民「招呼」梁振英，面陳房屋署欺壓小業主嘅管理問題。梁振英呢啲落區形象工程，安全系數應該比去論壇批評80後高好多。