華華對facebook（fb）好熟悉，但係facebook嘅管理層，華華就一個都唔識！正因為咁，噚日和電香港（215）旗下3香港夥拍facebook推出支援功能手機嘅facebookApp（應用程式），華華就專程過去紅磡，結識facebook亞太區董事梁幼莓Jayne嘞。若果無記錯，Jayne應該係facebook第一個喺香港媒體曝光嘅管理層，而佢張卡片（下圖），亦應該係香港傳媒首趟收到嘅facebook卡片。
講返facebookApp，一路以嚟都只係得智能手機嘅版本，但係家facebook就特登為功能手機設計J2ME應用程式，適用於超過2500款手機，家畀3香港獨家率先推出。唔講唔知，家陣全球原來有超過2億用戶經常用手機玩facebook，唔使iPhone都玩得，若果他日facebook上市，睇嚟佢哋啲股票都諗得過！