由谷德昭執導的賀歲片《神奇俠侶》將於農曆年迎戰《最強囍事》及《我愛HK開心萬歲》兩套電影。谷德昭對自己的作品充滿信心，相信《神》片這齣古裝喜劇可以殺出一條血路，他更希望藉着這套片創造出中國的超人。
賀歲片《神奇俠侶》由古天樂及吳君如擔任男女主角，故事講述一對擁有超能力的男女英雄隱居多年復出，該片導演谷德昭表示構思這個故事時是心有不甘，他說：「我本身好鍾意睇美國啲超人片，但係點解中國咁多年都冇超人，我條氣真係好唔順，講錢我哋一定唔夠美國多，但係講諗法我哋一定唔會輸。所以我好想拍一套屬於中國嘅超人片，第一時間我又諗起陳可辛，如果佢唔應承同我合作我就唔拍，再者如果唔係吳君如做女主角，我亦都唔想拍。」
後期製作落本
谷德昭指《神》片去年5月已拍完，但後期製作到上星期才正式完成。對於以往曾執導不少大堆頭賀歲片的谷德昭，他揚言今次開拍《神》片想有新嘗試，他續說：「我已經好多年都係拍大堆頭嘅賀歲片，嗰種賀歲片唔可以俾你慢慢拍，演員又多期又難度，拍完就要嗱嗱聲上。今次就好唔同，我花咗好多時間做後期，雖然好忙，我好enjoy個過程。」
提到吳君如在另一套賀歲影片《我愛HK開心萬歲》擔綱演出，自己打對台，谷德昭笑言：「早知我都自己打自己啦，其間都有其他人搵我拍賀歲片，但係我真係冇時間拍到。咁我希望觀眾入場睇晒三套賀歲片啦，港產片真係好需要大家支持，當然我對自己好有信心，亦都希望所有港產片收得好。」
古仔收埋Chok樣
此外，谷德昭大讚古天樂拿揑喜劇的技巧越來越好，他說：「佢家放鬆咗好多，佢終於㩒住自己個靚樣。至於君如嘅搞笑能力一向都咁強，不過有次陳可辛嚟監場，我第一次見到佢慌失失。」
採訪、攝影：李珮洳
