活樂遊2：掃街三盞燈　新抱仔豬腳薑

作為旅客，相信除了從澳門過關閘到珠海，都應該甚少會經過望廈山一帶，即使經過都未必會留意，皆因呢區環境普通過普通。但正因夠local，先隱藏着好多澳門人喜歡的食店、特別的口味，搞到連我哋曾特首都偷偷地嚟食。

記者：蕭漢祥
攝影：王文忠
模特兒：SukmiHo

人氣甜醋豬大腸

從望廈山出發去搵食，先要同大家上一堂地理課：望廈山位於澳門北部，北面連接珠海的關閘，南面是紅街市、三盞燈一帶，這區住宅、商業、工業、學校乜都有，感覺有如新蒲崗，呢度搵到的美食，好味得嚟又抵食！最多選擇的當然由三盞燈開始。其實之前不少朋友問，澳門一般都係食店，有無好似旺角般掃街式的小食，例如魚蛋、牛肚等。有……不過好少！三盞燈的正中心位置，旁邊有一條類似女人街的，僅僅有兩檔街邊小食，其中第一檔仲非常特別。
掃街食魚蛋食得多，街邊食甜醋豬腳薑都係第一次。這檔馮記三盞燈豬腳薑，據老闆馮先生所講全澳門只得兩間，他在二十年前開業，就係睇準呢門獨市生意，結果真係長做長有。馮先生不單止賣豬腳薑，仲有甜醋豬大腸、豬耳、雞蛋等，是甜醋食品標準的美味，也是一眾女士們最愛。馮先生的檔口長期排滿人龍，難怪做到馮生馮太出動埋新抱仔，都做不停手。

馮記三盞燈豬腳薑：馮生馮太以及新抱仔，一家人輪流開檔。

■檔口經常排長龍，我哋等影呢張相都等咗好耐。

■豬腳薑$20/碗
豬大腸、豬耳各$5/串

馮記三盞燈豬腳薑
地址：嘉路米耶圓形地旁（三盞燈）

特首偷食緬甸菜

話說去年11月初，一對香港夫婦，喺澳門專誠派遣保鑣，早半小時去到三盞燈一間緬甸餐廳，神神秘秘視察環境，兼搵老闆安排一張位於閣樓的餐枱。呢對夫婦就係……我哋香港特首伉儷，老闆娘葉太對於特首食過甚麼已無咩記憶，只記得他們來得快、吃得快、走得也快，咁匆忙阿曾生曾太都要嚟食，可見夫婦對雅馨幾咁欣賞。
兩位祖籍緬甸的老闆葉生葉太，推介三道地道菜式，開胃頭盤緬甸豬耳沙律，酸甜汁配豬耳爽口好味，食完更肚餓；風行印度的薄餅，去到緬甸亦有新口味，緬甸式甜薄餅烤得鬆軟香口，上面撒一層白糖；緬甸撈麪，就係冷麪配薯仔和緬甸馬拉盞，一般馬來西亞馬拉盞做成磚形，緬甸馬拉盞則呈片狀，內裏會有乾蝦，味道好特別。

雅馨緬甸餐廳：用酸甜汁浸製的緬甸豬耳沙律，爽口好味！$34/碟

■曾特首同老婆靜靜雞來食，後面有相為證o架。

■同一條街有兩間雅馨。

■屬於冷麪的緬甸撈麪，配上緬甸馬拉盞，味道特別。$17/碗

■緬甸口味甜薄餅，上面撒有白糖。$16/碟

雅馨緬甸餐廳
地址：三盞燈飛能便度街27號A及F地下

柬埔寨過癮咖喱

各地文化交流，令澳門好多食店地方菜其實都並非最正宗，雅馨老闆咁話，金城莊老闆是柬埔寨華僑，也認為柬埔寨菜有點像泰菜、印度菜：「柬埔寨鄰近印度、泰國、越南，柬埔寨菜跟三地都好似。」金城極受街坊歡迎，客人由朝早開始排長龍，想食最好早市後午市前去，否則想外賣都未必排到。小店最出名係咖喱雞米粉和咖喱雜錦米粉，但其實配菜係咩唔重要，因為大家最愛是其咖喱湯底，辣得味蕾好過癮！再加上吸晒咖喱湯的米粉，絕配！秘方？莊先生當然話係秘密，但透露咖喱粉來自東南亞，仲話絕不可用大陸貨，味道會差好遠。