大班鄭經翰雄濤廣播數碼電台年底開咪，新電台未出世已經備受關注，其中一個原因係股東來頭勁，包括李國寶、夏佳理、胡漢清等猛人。據講大班有意再買入拍檔股份，因為其中一名股東蒙民偉過身，蒙家未必想做傳媒業，所以大班可能與蒙家商量購入蒙民偉股份，如果成事，就係最大股東。
為預備年底啟播，新電台積極組班，《信報》高層游清源農曆年後會過檔新電台，大班強調絕無高薪挖角，更指游清源是「自己人」，之前只是「借調」到《信報》，家陣佢要人用，游清源自然要「歸隊」。
大班話游清源工作性質「一腳踢」，主要任務係搞創作，不排除開咪做節目，貫徹大班精明作風，請游清源十分「抵用」咁話。