國內噚日公佈最新嘅GDP，全年升10.3%，超出市場預期，人行啱啱調升咗存款準備金率，令投資者憂慮春節之後會加息，家GDP咁勁，加息嘅憂慮自然會成為炒作藉口，噚日滬深300指數跌3.2%，氣氛都幾曳，港股被大幅拖低415點，恒指報收24003，不過睇番衍生工具嘅活動，仲未見太淡嘅訊號。
恒指企喺24000樓上收市，仍喺10日線水平附近，守穩會掉頭上試24400。
中鋁C輪26474：中鋁（2600）報收7.72元，跌1%。股價連升兩日之後，噚日反覆微跌，相對大市嘅走勢算係強勢，短線阻力喺8.06元，破位會上試8.60元，可以諗吓隻C輪26474。
隻輪現價11.3仙，2011年7月4日到期，行使價7.38元，溢價10.2%，引伸波幅48%，槓桿率6.8倍（有效4.2倍），正股升上8.60元，26474睇17.3仙，升幅有5成，正股跌穿7.30元嘅話就沽咗隻輪。
俊樺