WEEKEND好旅程：活樂遊1：澳門六百蚊米芝蓮靚宿　尋找處男炮

WEEKEND好旅程：
活樂遊1：澳門六百蚊米芝蓮靚宿　尋找處男炮

不少港人愛到澳門遊，都好掛念以前馬交五六十年代矮樓房、通街係食店的風味。當大家以為城市化、娛樂場化已全面掩蓋澳門之際，原來還有一些角落尚未被娛樂化。

記者：蕭漢祥
攝影：王文忠
模特兒：SukmiHo

兵營改建　葡式風味

出發前，攝影師言談間話：「即使我有口臭也沒有銅臭，都係以前的澳門啱我口味。」的確，澳門現在娛樂場仲便利過便利店，很回味十多年前澳門的純樸……今次到訪北面望廈山上的望廈賓館（PousadadeMong-Ha），葡文Pousada解作「神聖的休息地方」。Sukmi卻猶豫：「賓館……住唔住得人o架？」大家咪俾賓館兩字嚇親，望廈賓館不但靚，過去三年還連奪「米芝蓮推介酒店」名銜。由澳門旅遊學院管理，用來訓練修讀旅遊及酒店業的學生，又點會容許環境同服務唔見得人呢。
望廈賓館除了有20間房間、兩間餐廳，其餘則是教學大樓。據講，以前由葡國管治時，澳門駐紮了大批僱傭兵，他們就住在當時屬於兵營的望廈賓館。後來兵哥走了，旅遊局95年把營房改建成現時的望廈賓館及旅遊學院，但保留及仿造了不少葡式建築風格，例如牆上藍白色的瓷磚畫、吊燈、旋轉樓梯等，靚成咁絕對唔係港人所想像的「賓館」！進入普通房間前有個小廳，連接兩個門口是通往浴室和睡房；尊貴套房更有一個客廳，論size真係唔可以用賓館的角度去想像。房間還有電腦和免費上網。賓館內招呼住客的工作人員，不是學院導師，就是在實習的二至四年級同學仔，服務水準拍得住真正酒店從業員。

■炮台頂這尊炮，係由安裝至今都未曾發射過一炮的處男炮。

■賓館周圍是大草地庭園。

■標準客房size大得不可以用賓館的標準來量度。

■前身為僱傭兵營地，葡式建築風格仍保留。

■在燈光映照下更突出葡國風味。

■龍友們與模特兒又多個好去處，賓館好多影相位，旋轉樓梯係其一。

■喺賓館餐廳用餐再加50元，仲可食埋甜品自助餐。

望廈賓館
地址：澳門望廈山
標準客房：$600至$800
尊貴套房：$1,100至$1,500
網址： http://www.ift.edu.mo/pousada

教學餐廳：抵食鬆軟鴨髀

好嘞，房間靚靚，餐飲都好重要，賓館內有提供自助餐或晚膳的教學餐廳，同樣都係學生的「課室」……吓?唔通所食都係試驗菜式，咪變晒白老鼠？咁又唔會，院方話食物全由曾任職酒店的大師傅所煮，學生作品唔會攞畀客人食，佢哋只係做侍應服務。講還講，試食最緊要，頭盤點選香煎鴨髀，鴨髀煎得外皮脆而肉質鬆軟，味道恰到好處；主菜紅酒燴羊膝，烹調方法令羊膝羶味大大減少，口感就像雞肉般滑溜。在此用餐再加50元，還可享用甜品自助餐，有芝士蛋糕、黑森林蛋糕、雪糕、香芒布甸和中式糖水等，甜品都有酒店水準o架。

■香煎鴨髀伴茴香沙律$40

■紅酒燴羊膝配欖油香茜煮白豆$110

望廈四圍望
百年炮台從未發炮

望廈一帶屬民宅區，無娛樂場、無大型商場，只得民房和學校等，感覺非常簡樸，就像回到十多年前的澳門，亦即係話呢一帶咁多年來都無咩改變。但，唔等於附近無景點，賓館一出門口，旁邊就有歷史悠久的望廈炮台，又稱為蓮峰山炮台或黑鬼山炮台，當年是澳門北面攻守的重地。從賓館斜路往上走，會見到一座寫上1866年的城堡，入面收藏了兩尊從未發過炮的「處男」炮台，係住客必到的影相位。