工業界議員林大輝噚日喺立法會上，第N次要求政府修例，容許廠商生產機器折舊扣稅。議員任期過咗一半，仍未成功爭取到呢個稅務優惠，林大輝好歹要向選民有個交代，噚日老羞成怒狂鬧財經事務及庫務局局長陳家強，套用「老闆」唐英年名句「閂埋門嚟做皇帝」，質問陳家強係咪以為自己係皇帝，唔肯接見廠商聽意見。
面對強勁炮火，陳家強口窒窒咁話可以隨時與林大輝見面食飯，絕對冇問題，又話其實上個月都有接觸林大輝，冇「閂埋門」。民主黨張文光睇準入楔位，指如果林大輝所言非虛，即係陳家強講大話，質疑官員誤導，涉及誠信，要求陳家強好好交代。