一年一度，中環人好想睇、已經搞咗第17次嘅里昂風水指數又嚟喇！
里昂噚日發表「2011辛卯兔年風水指數」，今年接手負責占卜嘅分析師周子諾話，金兔年受金木相剋，估計市況會比虎年更加波動，兔年開局應該會受挫，上半年就牛皮，新曆4、5月左右會有轉機，但係到6月弱勢又會再出現，而6月22日夏至之後，大市會上行拐點，而7月屬旺月，10月同2012年嘅1月屬土，利金。
恒指上望29000點
咁港股又睇幾多點呢？佢哋嘅中港策略研究部主管張耀昌話，里昂嘅houseview係恒指上望29000點，國指就上望15500點，而呢兩項預測，係以基楚因素分析得出，但係就同佢哋嘅風水預測非常不謀而合喎！
虎年估中三季市況
張生話，上半年大市走勢比較受政策影響，市場雖然仲俾通賬陰影籠罩住，估計政府仲會有打擊通脹嘅政策，直至呢啲政策出台接近尾聲，個市先會重拾升軌，大概係下半年左右喇！由於香港係受內地嘅輸入性通脹所影響，所以樓價會繼續升，加埋低息環境同供應不足，樓價有機會升10%至15%，假如「人仔」升值快啲，香港樓可能仲升得多啲。
咁到底呢個風水指數可信程度有幾高呢？Well，虎年都差唔多完嘞，截至噚日，佢哋嘅戰績係，除咗第四季嘅市況估唔中，頭三季基本上估中；另外，金價雖然衝唔破佢哋估嘅2000蚊美金一盎斯，但係俾佢哋估中不停咁升……咁大家又唔使咁苛刻嘅，如果樣樣嘢都俾佢哋估中，佢哋都唔使做分析師喇！
里昂睇兔年名人運程
「水蛇」伯南克 聯儲局主席
《順年》
佢將會迎接艱難嘅一年，刧難多數嚟自東方；雖然受到多方面嘅壓力，包括改變方向、作出妥協等，但係佢會充耳不聞。
「火狗」田北俊 香港旅遊發展局主席
《旺年》
吉星高照嘅「香港首席導遊」，除咗會印證咩叫老當益壯，今年仲會高枕無憂！另外，佢會喺不久將來，遇上改變佢人生嘅海外之旅。
「木蛇」張欣 Soho中國首席執行官
《順年》
新嘅一年對佢嚟講係個好年頭，但係少不免都會有啲絆腳石，佢需要盡量發揮佢嘅魅力、智慧同冷靜，去解決所面對嘅競爭同談判問題。
《旺年》
兔年會幸運連連，但係要遠離汽水同辛辣食物、避免衝突、注意形象同增加潮流觸覺。但願佢嘅旺年唔係建築喺別人嘅痛苦之上啦！
註：「水蛇」指生肖為蛇，五行屬水，如此類推
李華華
mailto:[email protected]